බන්ධනාගාර නීතිරීතීන්වලට අනුව, ඕනෑම සිරකරුවකුගේ සිර දඬුවම් කාලය තීරණය කිරීමේදී ඉරුදින, පොහෝදින. නිදහස් දින ආදී වශයෙන් වූ දිනයන් ‘‘සමා කාලයන්’’ ලෙස සලකා වසරක සිර දඬුවම් කාලයක් මාස 08යි, දින 10ක් ලෙස ගණනය කරනු ලබයි. ඒ අනුව, ෆොන්සේකා මහතාට දෙවන යුද අධිකරණය විසින් පැන වූ වසර දෙකහමාරක සිර දඬුවම අපේ‍්‍රල් 26 වනදායින් අවසන් විය.
මේ සම්බන්ධයෙන් අප කළ විමසීමකදී බන්ධනාගාරයේ උසස් නිලධාරියෙකු කියා සිටියේ, මෙතෙක් යුද හමුදා අධිකරණයෙන් ලබා දුන් නියෝග මත බන්ධනාගාරය තුළ රඳවා සිටි හමුදා සිරකරුවන්ගේ සිර කාලය නිර්ණය කිරීමේදී සාමාන්‍ය බන්ධනාගාර නීතිරීතීන්ට අදාළව සමා කාලයන් අඩු කොට සිරදඬුවම් කාලය තීරණය කරනු ලැබූ බවයි. එහෙත් ෆොන්සේකා මහතා සම්බන්ධයෙන් අනුගමනය කිරීමට යන විශේස විධිවිධාන බන්ධනාගාර ප‍්‍රධානීන්ට ගැටලූ සහගත වී ඇති බව හෙතෙම සඳහන් කළේය.
කෙසේ වෙතත්, ෆොන්සේකා මහතාගේ සිර දඩුවම අත්තනෝමතික ආකාරයෙන් තව දුරටත් දීර්ඝ කිරීමට ජනාධිපතිවරයා සහ නාගරික සංවර්ධන හා ආරක්‍ෂක අමාත්‍යංශයේ ලේකම්වරයා දරන උත්සාහය පරාජය කිරීම සඳහා වහාම අධිකරණය වෙත යෑමට ජෙනරාල්වරයාගේ නායකත්වයෙන් යුතු ප‍්‍රජාතන්ත‍්‍රවාදී පක්‍ෂය තීරණය කර තිබේ.
Source - lankanewsweb.com
