තමන්ගේ කැමැත්තට බලපෑමක් කළ හැකි පක්‍ෂ, සංවිධාන, ව්‍යාපාර පමණක් නොව පවුල් පවා කඩා බිඳ විසුරුවා දමා ප‍්‍රමෝධයක් ලබන ජනාධිපති මහින්ද රාජපක්ෂ මහතා මේ වන විට ශ්‍රේෂ්ඨාධිකරණයේ විනිසුරුවරුන් ද පැහැදිලිව දෙකට බෙදා තිබේ.
වත්මන් අගවිනිසුරු ආචාර්ය ශිරානි බණ්ඩාරනායක මහත්මියද තවත් වසර 09කට වැඩි කාලයක් එම තනතුරේ රැඳී සිටීමේ ව්‍යවස්ථානුකූල අයිතිය හිමිව ඇති බැවින්, ඇයගේ බලය බෙලහීන කිරීම සඳහා ජනාධිපතිවරයා මේ වන විට සැලසුම්සහගත කුමන්ත‍්‍රණයක යෙදී සිටින බව නීතිපති දෙපාර්තමේන්තුවේ ජ්‍යෙෂ්ඨ නිලධාරියෙකු අප වෙත පැවසීය. මීට පෙර අගවිනිසුරු ධූරයේ වසර 11කට වැඩි කාලයක් කටයුතු කළ සරත් නන්ද සිල්වා මහතා ඔහු විශ‍්‍රාම යාමට අවසන් මාස කිහිපය දක්වා ශ්‍රේෂ්ඨාධිකරණය තුළ තමන්ගේ ආධිපත්‍යය රැකගෙන සිටි නමුත්, වත්මන් අගවිනිසුරුවරියට එරෙහිව වසරක් යාමටත් පෙර ශ්‍රේෂ්ඨාධිකරණ විනිසුරුවන්ගෙන් අභියෝගයක් එල්ල වී ඇතැයි ද ඔහු සඳහන් කළේය. එවැනි පැහැදිලි බෙදීමක් ඇති කිරීමට ජනාධිපතිවරයා පෞද්ගලිකව මැදිහත් වී ඇති බව ඔහු වැඩිදුරටත් පැවසීය.
