බැඳපු දාම මනාලයාට ලැබුණ ලිපිය දැක මනාලියට යකා නැඟලා

සුනිල් ගමේ කොයි කාගේත් හොඳ හිත දිනාගත් තරුණ ගැටව් සියල්ලන්ම සහෝදරත්වයෙන් ඇසුරු කරන කඩිසර උත්සාහවන්ත තරුණයෙකි. මේ වන විට ඔහුගේ කලවයස් පිරී ඇති බැවින් දෙමහල්ලෝ මගුල් කපුවෙකුගේ මංගල යෝජනාවක් මගින් ඈත ගමකින් ඔහුට ගැළපෙන අන්දමේ මනාලියක් සොයා විවාහයක් කර දුන්හ. ගමේ තරුණ පෙළ එකමුතුව තම යහළුවාගේ විවාහය සඳහා සෑම උදව් පදව්වක්ම නොපිරිහෙලා ඉටුකරදුන් අතර අවසානයේ විහිළුවක් ද කිරීමට අමතක කළේ නැත.
මගුල් ගෙදර දෙවැනි ගමනදා දෙපැත්තෙන්ම නෑ දෑ පිරිස සතුටු සාමීචියේ යෙදී සිටියදී සුනිල්ගේ නමට තැපෑලේ ආ ලිපියකි. ලිපිය අතට ගත් සුනිල් සියල්ලන් ඉදිරියේම එය කියවා බලා බලවත් පුදුමයට හා ලැජ්ජාවට පත්විය.

මනාලියද එය අතට ගෙන බලා මේ මොන මගුලක්ද ගෑනියෙකුයි දරුවෙකුයි ඉන්න මිනිහෙක් එක්කද මම ආවේ කියමින් ගෙදර එකම ගාලගොට්ටියක් විය.
ලිපියේ ලියා තිබුණේ ආදර වස්තුවේ ඔයා බැන්දට මගේ තරහක් නැහැ. හැබැයි මාවයි දරුවයි බලාගන්න වුණ පොරොන්දුව නම් කඩ කරන්න එපා. මෙයට ඔබේ සදාදර ලතා යනුවෙනි.
මෙය සුනිල්ගේ යහළුවන් කළ ඇස් රතුවන නොමනා විහිළුවක් බව තේරුම් කර දීමට වැඩිහිටියන් මහත් උත්සාහයක් දැරූ අතර මගුල් ගෙදර මෙතෙක් පැවැති සතුට සන්තෝසය නැත්තටම නැතිවී ගොස් ඇති බව දක්නට ලැබිණි.