එළෙඹෙන අමාත්‍ය මණ්ඩල සංශෝධනයේදී ගෝඨාභය රාජපක්ෂ මහතා අග්‍රාමාත්‍ය ධුරය ලබා දීමට තීරණය කර ඇති ජනාධිපතිවරයා, ඊට පෙර ඔහුව ජාතික ලැයිස්තුවෙන් පාර්ලිමේන්තුවට ගෙන ඒමට බලාපොරොත්තු වන බව අප මීට දින කිපයකට පෙර දී වාර්තා කළෙමු.
මේ සම්බන්ධයෙන් අප කළ විමසීමකදී අදහස් දැක්වූ මර්වින් සිල්වා අමාත්‍යවරයාගේ සම්බන්ධීකරණ ලේකම්වරයකු කියා සිටියේ, ආරක්ෂක ලේකම්වරයා පසුගිය මාස කීපය පුරාම කැලණිය ආසනයේ කටයුතුවලට අනවශ්‍ය පරිදි අතපෙවීම් කරන බවයි. එහෙත් ආරක්ෂක ලේකම්වරයා කැලණිය ආසනයේ සංවිධායකවරයා වීමට අදහස් කර සිටින බවට මෙතෙක් වාර්තා වී නැතැයිද හෙතෙම කීය.
කෙසේ වුවද මර්වින් සිල්වා අමාත්‍යවරයාට එරෙහිව කැලණිය ප්‍රදේශීය සභාවේ සභාපතිවරයා ඇතුළු මන්ත්‍රීවරයා උසිගන්වනු ලැබුවේ ආරක්ෂක ලේකම්වරයා බවත්, ඇමතිවරයාගේ හිතවතුන් කීපදෙනෙක්ම සුදු වෑන්වලින් පැහැරගෙන යෑමටත්, තවත් දෙතුන්දෙනෙකු මරා දැමීමටත් ආරක්ෂක ලේකම්වරයා සම්බන්ධ බවට තහවුරු වී ඇතැයිද එම නිලධාරියා සඳහන් කළේය.
කුමන බලපෑම් පැමිණියද තම අමාත්‍යවරයාට ජනාධිපතිවරයාගේ සහ බැසිල් රාජපක්ෂ අමාත්‍යවරයාගේ උපරිම සහය ලැබී ඇති බවත්, එම තත්ත්වය යටතේ කිසිවෙකුට හෝ මර්වින් සිල්වා ඇමතිවරයාව කැලණිය ආසනයෙන් ඉවත් කිරීමට නොහැකි වනු ඇති බවත් ඔහු වැඩිදුරටත් සඳහන් කළේය.
කෙසේ වුවද අප වෙත ලැඛෙමින් පවතින තොරතුරු අනුව මර්වින් සිල්වා අමාත්‍යවරයාගේ සහ ඔහුට සමීප පුද්ගලයින්ට ආණ්ඩුවේ පාර්ශ්වයන් වෙතින්ම දැඩි අනතුරක් එල්ල වී තිබේ.
Source - lankanewsweb.com
