කටුගෙයි කඩු සොරකමට සියඹලාපිටිය හවුල් ලූ ?

ජාතික කෞතුගාගාරයේ අසිපත් හා රන් කාසි සොරකමට නාමල් රාජපක්ෂ මන්ත්‍රීවරයාට සුවච කීකරු අමාත්‍යවරයකුවන රංජිත් සියඹලාපිටිය මහතා සම්බන්ධ බවට සාධාරණ සැකයක් මතු වී ඇතැයි අපරාධ පරීක්ෂණ දෙපාර්තමේන්තුවේ ජ්‍යෙෂ්ඨ නිලධාරියකු තම පුවත්පත් ආයතනයේ මාධ්‍යවේදියකුට ප්‍රකාශ කර ඇතැයි 'දිවයින' පුවත්පතේ ජ්‍යෙෂ්ඨ මාධ්‍යවේදියකු අප වෙත පැවසීය.

ඒ සම්බන්ධයෙන් කිසිදු කටඋත්තරයක් හෝ නොගන්නැයි පොලිස්පතිවරයා අපරාධ පරීක්ෂණ දෙපාර්තමේන්තුවට නියෝග කර ඇතැයි ඔහු සඳහන් කළේය.

මෙම තොරතුරු ඇතුළත් විශේෂ වාර්තාවක් පසුගිය ඉරිදා දිවයින පුවත්පතේ පළ කිරීමට කටයුතු යොදා තිබුණද, තම පුවත්පත් ආයතනයේ ප්‍රධානී, ශ්‍රී ලංකා ටෙලිකොම් ආයතනයේ සභාපති නිමල් වෙල්ගම මහතාගේ නියමයෙන් පුවත්පත මුද්‍රණයට පෙර එම වාර්තාවේ ඇමතිවරයාට හා ආණ්ඩුවේ දේශපානඥයින්ට අදාළ කොටස් ගණනාවක් ඉවත් කළ බවද ඔහු සඳහන් කළේය.

මෙම අසිපත් සොරා ගැනීමට දින කිහිපයකට පෙර අදාළ දේශපාලඥයා කෞතුගාගාරයට පැමිණ එම අසිපත් නැරඹූ බවත්, ඔහු එම භාණ්ඩ ගැන දැඩි උනන්දුවකින් කරුණු විමසා සිටි බවත් අපරාධ පරීක්ෂණ දෙපාර්තමේන්තුවේ නිලධාරියා දිවයින මාධ්‍යවේදියාට ප්‍රකාශ කර තිබේ.

තවද එම සොරා ගැනීම සිදු වූ අංශයේ සහකාර කෞතුගාගාර අධ්‍යක්ෂවරයා පොලීසියට ලබා දී ඇති කටඋත්තර පරස්පර බවත්, ඔහු විෂය භාර අමාත්‍ය ආචාර්ය ජගත් බාලසූරිය මහතාගේ බිරිඳවන දකුණු පළාත් ආණ්ඩුකාර කුමාරි බාලසූරිය මහත්මිගේ සමීපතම හිතවතෙකු බවත් වාර්තාවේ. කුමාරි බාලසූරිය මහත්මිය ජනාධිපති මහින්ද රාජපක්ෂ මහතාගේ සමීපතම ඥාතිවරියකි.

Source - lankanewsweb.com