මොවුන් දෙදෙනා පොලිස් සුභසාධක මූලස්ථාන ගොඩනැගිල්ලේ රඳවාගෙන සිටින බව පසුගිය 12වනදා අපගේ වෙබ් අඩවියෙන් හෙළිදරව් කරන ලදී. අනතුරුව එදිනම රාත්‍රී ඔවුන් දෙදෙනා කොළඹ අපරාධ කොට්ඨාශ මූලස්ථානයට රැගෙන ආ බව අප වෙත වාර්තා වී තිබුණද අප ඒ පිළිබඳව හෙළිදරව් කිරීමෙන් වැලකී සිටියේ ඔවුන්ගේ ජීවිත වලට තර්ජනයක් වෙතැයි සැකය හේතුවෙනි.
එම වාහන දෙක පැමිණී වහාම, ඔළුවේ සිට දණිස් දක්වා ඛෙඩ්ෂීට්වලින් ආවරණය කරන ලද ලලිත් සහ කූගන් දෙදෙනා එම වාහනවලට දමාගෙන තිබේ. සාමාන්‍යයෙන් පැහැරගෙන එනු ලබන පුද්ගලයින්ගේ දැස් පමණක් බැඳ රැගෙන ඒම හා රැගෙන යාම සිදුකරන ලබන නමුත්, මොවුන් දෙදෙනාගේ හිසේ සිට දණිස් දක්වා ආවරණය කරනු ලැබුවේ එම ආයතනයේ සිටින අනෙකුත් පුද්ගලයන්ට ඔවුන්ව හඳුනා ගැනීම වළකාලීමට බව ද වාර්තාවේ.
එසේ වාහනයකට නංවන ලද එක් පුද්ගලයකු කළු පැහැති දිග කලිසමකින් සැරසී සිටි බවත්, අනෙක් පුද්ගලයාගේ දෙපා නිරාවරණ වී තිබී ඇත. ඔවුන් දෙදෙනාම ඉතා අමාරුවෙන් ඇවිද ගිය බව ද වාර්තාවේ.
ලලිත් හා කූගන් යන දෙදෙනා පොලිස් සුභසාධන මූලස්ථානයේ රඳවාගෙන නොමැති බවට පොලිස් මාධ්‍ය ප්‍රකාශක පොලිස් අධිකාරී අජිත් රෝහණ නොහොත් 'බත්බඩා' මාධ්‍ය වෙත කර ඇති ප්‍රකාශය අප්‍රේල් 12වනදා රාත්‍රියෙන් පසු වලංගු නමුත්, එතෙක් ඔවුන් එම ස්ථානයේ රඳවා සිටිබව අප යළිත් අවධාරණ කර සිටිමු.
ලලිත් හා කූගන් යන දෙදෙනා අද උදැසනවනවිටත් ජීවතුන් අතර සිටි බව අප දැඩි වගකීමකින් යුතුව ප්‍රකාශ කර සිටින අතර ඔවුන්ව බේරා ගැනීමට වහා මැදිහත්වන ලෙස ප්‍රජාතන්ත්‍රවාදය අගයන සියලූ දෙනාගෙන් දැඩිව ඉල්ලා සිටිමු.
Source - lankanewsweb.com
