ජනාධිපතිවරයා ලංකා බැංකු සභාපතිවරයාට දුරකතන ඇමතුමක් ලබා දුන් අවස්ථාවේදී, සභාපතිවරයා නිල කාමරයේ සිට ඇතත් ඔහුගේ පෞද්ගලික ලේකම්වරිය පවසා ඇත්තේ සභාපතිවරයා කාර්යාලයේ නොමැති බවයි. ඇය එසේ පවසා ඇත්තේ සභාපතිවරයාගේ ඉල්ලීම මතය. එහෙත් ජනාධිපතිවරයා වෙනත් මාර්ගයකින් සොයා බැලීමේදී සභාපතිවරයා කාර්යාලයේ සිටින බව තහවුරු කරගෙන තිබේ. සභාපතිවරයාට වහාම ඉල්ලා අස්වෙන ලෙස නියෝගය ලැබී ඇත්තේ ඉන් අනතුරුවය.
ලංකා බැංකු සභාපති ගාමිණි වික‍්‍රමසිංහ මහතා මෙම තනතුරට පත් කිරීම සඳහා නිර්දේශ කොට ඇත්තේ ආරක්ෂක ලේකම් ගෝඨාභය රාජපක්ෂ මහතාය. ගාමිණි වික‍්‍රමසිංහ මහතා ලංකාවේ ප‍්‍රසිද්ධ ව්‍යාපාරිකයෙකු වන අතර ‘ඉන්ෆෝමැටික්’ සමාගමේ සභාපතිවරයා වන්නේද ඔහුය. ආරක්ෂක ලේකම් ගෝඨාභය රාජපක්ෂ මහතා, ගජබා රෙජිමේන්තුවේ එවකට ලූතිනන් කර්නල්වරයකුව සිට විශ‍්‍රාම ගැනීමෙන් අනතුරුව රැකියාවක් නොමැතිව සිටියදී ඔහුට ‘ඉන්ෆෝමැටික්’ ආයතනයේ රැකියාවක් ලබාදී ඇත්තේ ගාමිණි වික‍්‍රමසිංහ මහතාය.
එයට ප‍්‍රතිඋපකාරයක් ලෙස රාජපක්ෂවරුන් බලයට පත් වූ වහාම ගාමිණි වික‍්‍රමසිංහ මහතාව විනියම සුරකුම්පත් කොමිසමේ සභාපතිලෙස පත්කරනු ලැබීය. ලංකා බැංකුවේ සභාපති ලෙස ඔහු පත්කරනු ලැබුවේ ඉන් අනතුරුවය.
ගාමිණි වික‍්‍රමසිංහ මහතා කොතරම් දක්ෂ ව්‍යාපාරිකයකු වුවද ඔහු යටතේ ලංකා බැංකුව කඩාවැටී ඇති බවත් බැංකු කටයුතු පිළිබඳ කිසිවක් නොදන්නා තම මිත‍්‍ර කරුණාජීව මහතා මහජන බැංකුව කෙටි කලක් තුළ ඉහළට ගෙනා ආ බවත් ජනාධිපතිවරයා පසුගිය දා ජනාධිපති කාර්යාලයේ නිලධාරීන් සමඟද පවසා තිබේ. කෙසේ වුවද ජනාධිපතිවරයා හා ගාමිණි වික‍්‍රමසිංහ මහතා අතර ගැටුම සමතයකට පත් කොට වික‍්‍රමසිංහ මහතාව ලංකා බැංකු සභාපති ධුරයේ තවදුරටත් රදවා ගැනීමට ආරක්ෂක ලේකම්වරයා මේවනවිටත් බලවත් උත්සාහයක් දරමින් සිටී.
Source - lankanewsweb.com
