ත‍්‍රස්ත විමර්ශන ඒකකයේ නිලධාරීන් පිරිසක් විසින් පෙරටුගාමි සමාජවාදි පක්ෂයේ නායක කුමාර් ගුණරත්නම් මහතා හා එම පක්ෂයේ කාන්තා අංශයේ නායිකාව වන දිමුතු ආටිගල මහත්මිය අත්අඩංගුවට ගෙන ඇතැයි පොලිස් මූලස්ථාන ආරංචි මාර්ගවලින් අප වෙත වාර්තා වේ.
මෙම මෙහෙයුම සදහා අපරාධ පරීක්‍ෂණ දෙපාර්තමේන්තුවේ නිලධාරීන් තිදෙනෙකු ද සහභාගී වී ඇත. එහෙත් ඔවුන් දෙදෙනා මේ වන තෙක් පොලිස් මූලස්ථානයේ 4 වැනි තට්ටුවට හෝ 5 වන තට්ටුවට රැගෙන විත් නැති බවත්, රහසිගත ස්ථානයක රදවා සිටින බවත් පොලිස් මූලස්ථානයේ ජ්‍යෙෂ්ඨ නිලධාරියෙකු අප වෙත පැවසීය.
පෙරටුගාමී සමාජවාදී පක්ෂයේ ක‍්‍රියාකාරිකයෙකුගෙන් කළ විමසීමකදී ඔහු කියා සිටියේ ලබන 09 වැනිදා පැවැත්වෙන පක්ෂ සමුළුව සම්බන්ධයෙන් ඊයේ රාත‍්‍රියේ තලවතුගොඩ පැවති අභ්‍යන්තර සාකච්ඡාවකට සහභාගී වූ ඔවුන් දෙදෙනා ඉන් පිටව ගිය බවත්, අතර මගදී ඔවුන් අත්අඩංගුවට ගෙන ඇති බවත් පැවසිය. අද උදෑසන කිරිබත්ගොඩ නිවසක පැවැත්වීමට නියමිතව තිබූ සාකච්ඡාවකට කුමාර මහතා සහභාගී නොවීම පිළිබද සොයා බැලීමේදී ඔහුව පැහැර ගැනීමට ලක්වී ඇති බව තහවුරු කර ගත් බවත් හෙතෙම සදහන් කළේය.
කුමාර මහතා අත්අඩංගුවට ගැනීමට සහභාගී වූ ත‍්‍රස්ත විමර්ශන ඒකකයේ නිලධාරීන් හා අපරාධ පරීක්‍ෂණ දෙපාර්තමේන්තුවේ නිලධාරීන්ගේ නම් අප නොපමාව හෙළිදරව් කිරීමට කටයුතු කරමු.
කෙසේ වුවද කුමාර් ගුණරත්නම් මහතා රහසිගතවම ඝාතනය කිරීමේ අවධානමක් පවතින බවද අප වෙත තොරතුරු ලබා දුන් පොලිස් නිලධාරියා වැඩිදුරටත් පැවසීය.
Source - lankanewsweb.com
