උසාවි නියෝග නොතකා තල්දූවේ මැණික් ජාවාරමක්

ආණ්ඩුවේ දේශපාලනඥයින්ගේ හිතවතුන් පිරිසක් තල්දූව පාලම අසල නීති විරෝධී ලෙස මැණික් ගැරීමේ නිරත වී සිටිති. එම මැණික් ගැරීමට ප්‍රදේශීය දේශපාලනඥයන් හා ඇමති සම්බන්ධීකරණ ලේකම්වරුන් දෙදෙනෙක්ද සම්බන්ධ වී ඇත.

පසු ගිය කාලය තුළ අවිස්සාවෙල්ල - කෑගල්ල පාරේ තල්දූව පාලම අසල සීතාවක ඟගේ යම් යම් පිරිස් මැණික් ගැරීම් සිදුකර ඇත. එහි දී එම ස්ථානයේ මැණික් නිධියක් පිහිටා තිබීම හෙළිදරව්වීමත් සමඟ දෙහිඕවිට ප්‍රාදේශීය සභාවේ දේශපාලනඥයන් දෙදෙනෙකු මැණික් ගැරීමට පැමිණ ඇතත් ප්‍රදේශවාසීන් ඊට විරෝධය පලකර ඇත.

පසුව මෙම ස්ථානයේ මැණික් ගැරීම තහනම් කරන ලෙස මෙම දේශපාලනඥයින් අවිස්සාවෙල්ල මහඅධිකරණයෙන් තහනම් නියෝගයක් ඉල්ලා තිබේ. ඊට අනුව පසුගිය මාර්තු 20වනදා තල්දූව පාලම අසල මැණික් ගැරීම තහනම් කරමින් අවිස්සාවෙල්ල අධිකරණය නියෝගයක් පනවා ඇත. පසුව මෙම නියෝගය උපයෝගී කරගනිමින් එම් ස්ථානයට ප්‍රදේශයේ පිරිස් පැමිණීම වැලක්වා මෙම දේශපාලනඥයන් හා ඇමති සම්බන්ධීකරණ ලේකම්වරු දෙදෙනා රාත්‍රි කාලයේ දී මැණික් ගැරීමේ නිරතව සිටිති.

මෙලෙස නීති විරෝධී ලෙස මැණික් ගැරීමට සම්බන්ධ වූ ලේකම්වරුන් දෙදෙනා සබරගමුව පළාතේ ප්‍රධාන දේශපාලනඥයන් දෙදෙනෙකුගේ ලේකම්වරුන් බව වාර්තාවේ. මොවුන් විසින් මෙම මැණික් ගැරීම සඳහා රාත්‍රී කාලයේදී කිමිදුම් කට්ටල හා අධිබලැති විදුලි පන්දම් උපයෝගී කර ගන්නා බව ප්‍රදේශවාසීහු පවසති. එමෙන්ම මෙම භූමිය පුරාවිද්‍යා දෙපාර්තමේන්තුව යටතේ පවතින සංරක්ෂිත බිමකි.

Source - lankanewsweb.com