සුදු වෑන් රියකින් පැමිණ තරුණියක් පැහැර ගනී

මන්නාරම අඩම්පන් ප්‍රදේශයේ සිට සුදු වෑන් රියකින් පැමිණ තරුණියක් පැහැර ගෙන යමින් සිටියදී එම පිරිස වව්නියාව සෙට්ටිකුලම් ප්‍රදේශයේදී පොලිස් අත්අඩංගුවට ගෙන තිබේ. පැහැර ගැනීමට ලක් වූ තරුණිය මඩු අධ්‍යාපන කාර්‍යාලයේ කළමනාකාර සහායක ලෙස රැකියාව කරන බවත් 22 හැවිරිදි වියේ පසුවන ඇය රැකියාව සදහා පාපැදියෙන් යමින් සිටියදී 18 උදේ 8ට පමණ වෑන් රථයකින් පැමිණි පිරිසක් විසින් පැහැර ගෙන ගොස් ඇති බවත් සෙට්ටිකුළම පොලිසිය කියයි.
පැහැර ගැනීමට ලක් වූ ස්ථානයේ සිට කිලෝ මීටර් 50ක් පමණ දුරින් පිහිටි ගජසිංහපුර ප්‍රදේශයේ රාජකාරියේ යෙදී සිටි පොලිස් නිලධාරින් විසින් අධික වේගයෙන් යමින් තිබූ වෑන් රථය අත්අඩංගුවට ගෙන පරීක්ෂා කිරීමේදී පැහැර ගැනීමට ලක් වූ තරුණිය හමු වී තිබේ. 


සනත් ප්‍රියන්ත - වව්නියාව