මේ බව සිරිධම්ම හිමියන් පවසා තිබුනේ උන්වහන්සේගේ කැමරාවෙන් නැතිවූ ජායාරූප වල ටී ෂර්ට් ඇඳන් හිඳීම පිළිබඳව පසුගියදා රන්දිව පුවත්පත සමඟ පැවැත්වූ සාකච්ජාවකදී ඇසූ පැනයකට පිළිතුරු දෙමින්.
ප්‍රශ්නය: ස්වාමීන්වහන්ස, පසුගිය කාලයේ ආන්දෝලනාත්මක ජායාරූපයක් පුවත්පත්වලත්, තාප්ප, බිත්ති පුරා ඇලවුණු පෝස්ටර් මඟිනුත් ප්‍රසිද්ධ වුණා. ඒ ජායාරූපයේ ථේරවාදී භික්ෂුවක වන ඔබ වහන්සේ ටී ෂර්ට් එකක් ඇඳගන ගලක් මත වාඩිවී සිටිනවා. එකී පුවත්පත් හා පෝස්ටර් ව්‍යාපාරය තුළින් ප්‍රකාශයට පත්වුනේ ඔබවහන්සේ බෞද්ධ භික්ෂුවකට සුදුසු නොවන ක්‍රියාවක් කළ බවයි. මේ නිසාම පිටිදූවේ සිරිධම්ම හිමියන් ශාසනයට නොගැලපෙන බවටත් මතයක් ගොඩනැඟුනා මේ සම්බන්ධයෙන් ජනතාව ඔබ වහන්සේගෙන් පිළිතුරක් බලාපොරොත්තු වෙනවා.
පිළිතුර: භික්ෂුවකගේ "විනය" කියන එක හරි අමුතු දෙයක්. දැන් කවුරුත් දැකලා නැද්ද හාමුදුරුවරු සිරීපාදේ යනකොට සිවුරේ පාටින්ම ටී ෂර්ට් එකක් සිවුරට යටින් ඇඳලා ඊට පස්සේ සිවුර පොරවගන්නවා. ඒක ඕනෑම භික්ෂුවක් කරන දෙයක්. ඒ වගේම අපි සාමාන්‍යයෙන් සිවුර අඳින්න කලින් යටට කමිසයක් වගේ එකක් කොහොමත් අන්ඳිනවා. ඒකට කියන්නේ අඳනකඩයක් අඳිනවා කියලා. ඒ කියන්නේ සිවුරේ දහඩිය ගෑවෙනවට ඊට යටින් අඳනකඩයක් ඇඳලා තමයි සිවුර අඳින්නේ. ඉතින් මිනිස්සුන්ට ඒක පේන්නේ නැහැනේ. මිනිස්සු දකින්නේ උඩින් අඳින සිවුර විතරයි
ඒ වගේම භික්ෂූන් වහන්සේ නමක් වැසිකිළියකට යනවා නම් භික්ෂූන් වහන්සේලාගේ "සේකියා ශික්ෂාපද" වල තිබෙන විදිහට මුලින්ම සිවුර ගලවලා දොරට උඩින් දාන්න ඕනේ. ඒ වගේම් නානකොට කවුද සිවුරු ඇඳගන නාන්නේ. එතකොට ඔය ප්‍රශ්න ඔක්කොම මතුවුනේ ඇයි? මම අහන්නේ මොකටද කවුරුත් නාන පින්තූර මේ පත්තර වල දාන්නේ? පෝස්ටර් විදිහට අලවන්නේ? රටේ රජ්ජුරුවන්ගේ නාන පින්තූරයක් දාලා "මෙන්න මෙයා ඉන්න හැටි" කියලා කිව්වොත් ඒක යථාර්ථයක්ද?
මජ්ජිම නිකායේ අරියපර්යේෂණ සූත්‍රයේ බුදුරජානන්වහන්සේ ගැන මෙහෙම තියනවා. උන්වහන්සේ සවස් වෙලාවේ සිවුර ගලවලා නාලා තනි සිවුරෙන් වැඩ ඉන්නවා කියලා. දැන් ඇයි එහෙම ඉන්නේ? ශරීරයේ තෙත හිඳෙන්න. තනි සිවුරෙන් සිටිනවා කියන්නේ මොකක්ද? අඳනකඩය පිටින් ඉන්නවා කියන එක. එතකොට බුදුහාමුදුරුවොත් අඳනකඩය පිටින් වැඩ සිටිනවා කියන එක. එතකොට බුදුවරුත් අඳනකඩේ වැඩ සිටිනවා. එහෙමනම් මට ඇති ප්‍රශ්නය මොකක්ද?
සාමාන්‍යයෙන් මම සිවුර පොරවන් ඉන්නේ මිනිස්සු ඉන්නකොට විතරයි. කාමරයේ ඉන්නකොට, ආරාමයේ ඇවිදිනකොට මම සිවුර පොරවන් ඉන්නේ නෑ. බොහෝ වේලාවට සිවුර ගලවලා අඳනකඩයෙන් ඉන්නේ. ඒක සාමාන්ය සිද්ධියක්. දායකයෝ ආවම, ධර්ම දේශනා කරනකොට, පිරිත් කියනකොට, ආගමික කටයුතු කරනකොට සිවුර ඇඳගන ඒවා කරනවා. මේක මේ මම විතරක් කරන දෙයක් නෙවෙයි. මේ ලෝකයේ ඉන්න ඕනෑම ථේරවාදී භික්ෂුවකගේ ක්‍රමය ඒකයි.
ඔය ජායාරූප ගැන කියනවා නම් මම දවසක් ගියා රිටිගල කැලේ භාවනා කරන්න. මාත් සමඟ එදා ලමුන් කීපදෙනෙකුත් ගියා. රස්නේ වැඩිවුන නිසා මම සිවුර ගලවලා ඔවුන් අතට දීලා නාගන්න කියලා කැළේ ඇතුලට ගියා. ඒ වෙලාවෙ මම කැලෙ ගලක් උඩට වෙලා ටික වෙලාවක් භාවනා කළා. ඒ අතරේ මාත් එක්ක ගිය අර ලමයි මගේ ජායාරූප අරගන තියනවා.
ඒකටත් හේතුවක් තියනවා. මම ඒ වෙලාවේ බොහෝම නිදහසේ හිටියේ. ඒ නිදහසේ සිටීමට මම ඉරියව් දෙකක් පාවිච්චි කළා. ඒ ඉරියව් දෙකෙන් එකක් තමයි "ධ්‍යානීය ඉරියව්ව". ඒ කියන්නේ එරමිනියා ගිතාගන අතේ ඇන්ඟිලි දනහිස මත සිටින සේ තබාගන හිඳීම. අනෙක් විදිහ තමයි "රාජාසන ලීලාව" රාජාසන ලීලාව කියන්නේ දකුණු කකුල ඔසවලා දකුණු අතේ වැලමිට දකුණු කකුලේ දනහිස මත වැටෙනසේ අත නිදහසේ තියාගන ඉඳගන සිටීම.
සියළුම බෝධිසත්වයන් වහන්සේලා වැඩ ඉන්නේ ඔය ඉරියව් දෙකෙන් එක්කෝ ඔවුන් ධ්‍යානීය ලීලාවෙන් වැඩ ඉන්නවා. ඉතින් ඒක මට පුරුදු වෙච්ච දෙයක්.
දැන් එතකොට ඔය පින්තූර සේරම දාලා මාව කවුරු කියලද ඒ අය කිව්වේ? මට මඩ ගහන්න ආවම අන්තිමට ඒ මඩ වලින්ම මඩ රත්තරන් ඔටුන්නක් කරලා මට දාලා ඒගොල්ලෝ අයින්වුනා. ඒක තමයි ලෝක ස්වභාවය.
උපසම්පදා භික්ෂුවකට අදාල ශික්ෂා පද 237ක් තියනවා. මම අභියෝග කරනවා ඔය ෆොටෝ බලලා පුළුවන් නම් මෙන්න මේ ශික්ෂා පදේ කඩලා තියනවා කියලා ඔප්පු කරන්න. මම එක ශික්ෂා පදයක්වත් කඩලා නෑ. ශික්ෂා පද හරියට ආරක්ෂා කරලා තියනවාඅ. මිනිස්සු මෝඩයි, ඔවුන්ට තෙරුමක් නෑ භික්ෂු ජීවිතය පිළිබඳව.
දවසක් විශාකා සැවැත් නුවර ජේතවනාරාමයට යනකොට එහි භිෂූන් වහන්සේලා නිරුවතින් නානවා. එය දැකලා විශාකා උපාසිකාව බුදුන් වහන්සේට ගිහින් කියනවා "ස්වාමීනි, මේ විදිහට භික්ෂූන් වහන්සේලා නානකොට කැතයිනේ, ඔබ වහන්සේ පවසන්න උන්වහන්සේලාට අඳනකඩයක් ඇඳන් නානලෙසට" කියලා. එදා ඉඳලා තමයි මේ නීතිය පැනවෙන්නේ.
අපි නිරුවතින් නාන්නේ නෑ. අපි අඳනකඩයක් හරි නානකඩයක් හරි ඇඳගනයි නාන්නේ. ඒක බුද්ධ නීතිය. ඉතින් නානකොට ගත්ත පින්තූර මොකටද පත්තර වල දාන්නේ? මේවා පත්තරවල දැමීමෙන් මොනවද බලාපොරොත්තු වෙන්නේ? දැන් මම මේ හැම දේකම අග මුල පැහැදිලි කරන්නම්.
මහා කාශ්‍යප මහ රහතන්වහන්සේ බුද්ධ කාලයේ ජීවත්වුන මහරහතන්වහන්සේ කෙනෙක්. උන්වහන්සේ වේද, වේදාන්ත, දේශපාලන විද්‍යාව ආදී සියළු ශාස්ත්‍ර හොඳට ඉගනගත්ත කෙනෙක්. උන්වහන්සේ උසස් කුළයක බ්‍රාහ්මන වංශිකයෙක්. ඒත් උන්වහන්සේ ඒ සියල්ල ඉගනගන, සියළු සම්පත් අත හැරලා පැවිදිවූ කෙනෙක්. උන්වහන්සේගේ රූප ස්වභාව නිසා ඒ ශරීරය දැක්කාම ඕනේ කෙනෙක් වශී වෙනවා. දවසක් උන්වහන්සේට ගංගාවක් ලඟ නාන්න හිතුනා.
ඉතින් උන්වහන්සේ සිවුර ගලවලා නාන්න සූදානම්වෙද්දී එතැනින් යනවා සිටුවරයෙක්. ඒ සිටුවරයාගේ නම සෝරයිය. සිටුවරයා දකිනවා සිවුරක් නැතුව ලස්සන ශ්‍රමණයෙක් ගඟේ නානවා. වෙලාවට කැමරාවක් තිබුනේ නෑ. තිබ්බා නම් ගන්නවා ෆොටෝ එකක්. ඒ වෙලාවේ මහා කාශ්‍යප මහ රහතන් වහන්සේ ගැන කාමයක් ඇතිකරගන්න සිටුවරයාට හිතෙනවා. "මගේ නෝනා වත් මෙච්චර ලස්සන නැහැනේ" කියලා. ධම්මපදට්ඨ කතාවේ තියනවා සෝරයිය සිටුවරයා ගැහැණියක් වුන කතාව.
පිරිමියෙක් ගැහැණියක් වුන එකම කතාව ලෙස ධම්ම පදට්ඨ කතාවේ තියෙන්නේ සෝරයිය සිටුවරයාගේ කතාව. ගැහැණියක් වුන සිටුවරයා කාලෙකට පස්සේ නැවත ගිහිල්ලා කාශ්‍යප රහතන් වහන්සේට මේ සිදුවීම කියලා සමාව ඉල්ලගත්තම නැවත පිරිමියෙක් බවට පත්වෙනවා. ඉතින් මට මේ විදිහට කරපු අයටත් මේ විදිහට වෙයි.
යම් කෙනෙක් මුනිවරයෙක්ද කියලා දැනගන්න හොඳම විදිහ තමයි ඔහු සිවුර ගැලෙව්වම ඔහු ලඟ තියන මහා පුරුෂ ලක්ෂණ. දැන් ඔය පළ කළ මගේ පින්තූර අරගන බලලා මගේ ශරීරයේ මහා පුරුෂ ලක්ෂණ පරීක්ෂා කරලා බලන්න. මගේ ශරීරයෙත් බුදුවරුන්ගේ වගේම මහා පුරුෂ ලක්ෂණ තියනවා.
එම සම්පූර්ණ ලිපිය මෙතනින්.
සටහන
බුදුවරුන්ගේ වගේම පිටිදූවේ සිරිධම්ම හිමිගේ ශරීරයේ ඇති එම මහා පුරුෂ ලක්ෂණ පිළිබඳව උන්වහන්සේ විස්තර කරන ආකාර ලබන සතියේ රන්දිව පුවත්පතේ පලවූ විගස ඔබ වෙත ගෙන ඒමට අප බලාපොරොත්තු වෙනවා.
Source: http://www.gossip9.com/2012/02/blog-post_9053.html#ixzz1lrix45z7
